Minisitiri w’urubyiruko yashimye urubyiruko rwabungabunze imihanda

Ku bufatanye bwa Minisitier y’urubyiruko n’iterambere ry’ubuhanzi ; Minisiteri y’ibikorwa remezo binyuze mu kigo cyayo cya RTDA ndetse na Rwanda Roads Fund, mu Karere ka Huye habereye igikorwa cyo kwishimira ibyagezweho na sosiyete 158 z’urubyiruko zahawe akazi muri gahunda yo gufata neza imihanda y’igitaka (Road Maintenance Programme) mu bice bitandukanye by’Igihugu kuva 2022-2026. 

Iki gikorwa cyabereye mu murenge wa Tumba kuwa 12 Ugushyingom 2026. Gahunda yo guha akazi urubyiruko yari igamije kubungabunga no gufata neza imihanda no guhanga imirimo; bigaragaza ubushake bw’inzego za Leta no gushakira imirimo urubyiruko mu bikorwa byose (Youth jobs mainstreaming).

Minisitiri w’urubyiruko n’iterambere ry’ubuhanzi Dr Utumatwishima Murenzi Abdallah

Mu butumwa Minisitiri w’urubyiruko n’iterambere ry’ubuhanzi Dr Utumatwishima Murenzi Abdallah yagejeje ku bitabiriye igikorwa cyo kwishimira ibyagezweho na gahunda yo gufata neza imihanda y’igitaka (Road Maintenance Programme), yashimye uruhare rw’amasosiyete 158 y’urubyiruko asoje icyiciro cya mbere cy’iyi gahunda, yatangiye mu 2022.

Yagaragaje ko mu myaka ine ishize, iyi gahunda yafashije guhanga imirimo isaga 10,000 buri mwaka, inagira uruhare mu kubungabunga imihanda no koroshya ubuhahirane n’iterambere.

Minisitiri Utumatwishima yashimangiye ko ibyo urubyiruko rwagezeho ari intambwe ikomeye igaragaza ubushobozi bwarwo bwo kwihangira imirimo no kugira uruhare mu iterambere ry’Igihugu. Yagize ati: “Ibyo mwagezeho ni ibyo kwishimira no gukomeza kubakiraho. Uyu munsi muduteye ishema.”

Yasoje ashimangira ko gusoza iki cyiciro atari iherezo, ahubwo ari intangiriro y’indi ntambwe yo guteza imbere imirimo y’urubyiruko no kubungabunga ibikorwaremezo by’Igihugu.