Mu nama y’Ihuriro ry’abafatanyabikorwa mu iterambere (JADF), Umuyobozi w’iri huriro yasobanuye ku ruhre rufatika rw’umufatanyabikorwa n’icyo byarushaho gufasha mu iterambere, agaragaza ko umuturage yarushaho kwegerwa.

Ni inama yateranye ku wa 09 Kamena 2023, ihurizahamwe abafatanyabikorwa mu iterambere mu ngeri zitandukanye barimo imiryango idahanira inyungu, abikororera, abanyamadini n’abandi.

Umuyobozi w’Akarere ka Huye, Sebutege Ange, atangiza ku mugaragaro ihuriro rusange ry’abafatanyabikorwa mu iterambere ry’akarere ka Huye, yasabye abarigize gushyira imbaraga mu kuvana umuturage mu bukene.

Yagize ati “Twagira ngo tubashimire uruhare rwanyu mu iterambere ry’akarere n’umuturage twese tureberera. Ibyo dukora byose tubihurize ku gufasha umuturage kwikura mu bukene, gahunda yari isanzwe ihari yari ugufasha abatishoboye; guhora ufasha umuntu mu myaka icumi adatera imbere ntawe bishimisha. Ibi bikorwa nta ngengo y’imari yihariye bifite ariko nidushyira umuturage ku isonga y’ibyo dukora tukanashyira hamwe bizakunda.”

Umuyobozi w’ihuriro ry’abafatanyabikorwa mu iterambere (JADF) ry’akarere ka Huye, Ugirumurera Cyprien, agaruka ku ruhare rw’umufatanyabikorwa n’icyo byarushaho gufasha mu iterambere, avuga ko umuturage yarushaho kwegerwa.

Agira ati “Ubu mu mirenge yose y’akarere abafatanyabikorwa barimo, ibikorwa afatanyabikorwa bagizemo uruhare muri uyu mwaka ni byinshi. Turashima inzu zubatswe, amatungo n’ibindi. Twaganiriye ku kwegera umuturage mu kagari, abafatanyabikorwa babyemeye, nibigerwaho twegereye umuturage bizadufasha kumukorera uko bikwiye”.

Uyu muyobozi avuga ko hagiye gukomeza gushyirwa imbaraga mu kwegera abaturage bagafatanya cyane cyane mu gukoresha neza ibyo abafatanyabikorwa bafasha abaturage, bakabazamurira imyumvire kugira ngo abaturage barusheho kwiteza imbere, bave mu cyiciro kimwe bajye mu kindi, ku buryo bazakomeza kwigigirira akamaro n’iyo aba bafatanyabikorwa baba batagihari.

Abafatanyabikorwa mu iterambere ry’akarere ka Huye bashimirwa uruhare bagira mu iterambere, ariko kandi basabwa gukomeza guhuza ibikorwa byabo n’intego z’iterambere ry’akarere ndetse no gukorera hamwe hagati yabo.

Muri iyi nama haganiriwe ku ngigo zitandukanye zirimo imihigo y’Akarere 2022-2023; gahunda yo gufasha abaturage mu buryo burambye; gahunda y'Iterambere rirambye (DDS); imikorere n’imikoranire muri JADF.