Mu gutangiza icyumweru cyahariwe kwita ku buzima bw’umwana n’umubyeyi, hagaragajwe iby’ingenzi bikwiye kwitabwaho mu gusigasira ubuzima bw’umwana n’umubyeyi kandi ababyeyi bashishikarizwa kuzitabira gahunda zateganijwe mu cyumweru cy’ubuzima bw’umubyeyi n’umwana.

Ibi byagarutsweho kuwa 13 Mutarama 2025 hatangizwa icyumweru cyahariwe ubuzima bw'umwana n'umubyeyi (MCH week). Ku rwego rw’Akarere iki cyumweru cyatangirijwe mu murenge wa Mbazi. Mu butumwa yatanze, Umuyobozi w'Akarere wungirije ushinzwe imibereho myiza Madamu Kankesha Annonciata yashishikarije ababyeyi kunoza isuku mu buryo buboneye; kuboneza urubyaro no gukumira inda zitateganyijwe.

Uyu muyobozi yashishikarije ababyeyi kwipimisha inda inshuro ziteganijwe kuri buri mubyeyi utwite no kubyarira kwa muganga, kandi bikajyana no gukingiza inkingo zose umwana.

Mu kwita ku bana, yashishikarije ababyeyi konsa abana uko bikwiye, kubagaburira indyo yuzuye no kubagirira isuku.

Muri iki cyumweru cyahariwe ubuzima bw’umubyeyi n’umwana, hibanzwe ku bikorwa birimo gupima abana imikurire; gukingira abana; gutanga ibinini bya “Vitamin A” ku bana n'abantu bakuru no gutanga “Ongera intungamubiri”.

Muri iki cyumweru hanatanzwe serivisi zo kuboneza urubyaro hanatangwa ubutumwa bwo kurwanya igwingirira n'imirire mibi n'ubuzima bw'umwana n'umubyeyi muri rusange.