Hamwe na Minisiteri y’Ubumwe bw’Abanyarwanda n’inshingano mboneragihugu, mu Karere ka Huye hakozwe ibiganiro byateguwe bigamije kungurana ibitekerezo hagati y'abayobozi mu nzego z'ibanze n'abagenerabikorwa bahabwa inkunga ku buryo inkunga bahabwa zarushaho kubagirira akamaro no kubakangurira kugira uruhare mu gukemura inzitizi zikigaragara mu mitangire n'imikoreshereze y'inkunga.

Ni ibiganiro byabaye kuwa 09 Mutarama 2025, byitabirwa n’Abayobozi b'inzego z'ibanze batandukanye ku rwego rw’Akarere n’abahagarariye imiryango iharanira inyungu z'abarokotse Jenoside yakorewe Abatutsi.

Ibi biganiro byateguwe hagamijwe kuganira n'abayobozi b'inzego z'ibanze n'ab'imiryango iharanira inyungu z'abarokotse Jenoside yakorewe Abatutsi, uburyo bwo kunoza imitangire n'imikoreshereze y'inkunga; gusobanurira abagenerwabikorwa b'inkunga zihabwa abatishoboye barokotse Jenoside yakorewe abatutsi, ibishingirwaho mu gutanga inkunga, uburenganzira n'inshingano byabo no gukurikirana ko abagenerwabikorwa b'inkunga batera intambwe mu rugendo rwo kwikura mu bukene no kwigira.

lnkunga zatanzwe zibanze cyane cyane mu burezi, mu buvuzi, mu mishinga ibyara inyungu, mu macumbi n' inkunga y'ingoboka. lzi gahunda zose zafashije abarokotse kugarura icyizere cy'ubuzima no kongera kwiyubaka.

Nubwo hari byinshi byagezweho muri gahunda zo gufasha abatishoboye barokotse Jenoside yakorewe Abatutsi, haracyari inzitizi zituma intego igamijwe yo gufasha kwigira itagerwaho uko bikwiye.

Mu nzitizi zagaragajwe zirimo kutubahiriza amabwiriza agenga imitangire y'inkunga; bikozwe n'abayobozi batandukanye, baba ab'inzego za Leta ndetse n'abahagarariye imiryango y'abarokotse;  kudakurikirana abagenerwabikorwa bahabwa inkunga kugira ngo bagirwe inama; kudakurikirana imyubakire y'amazu no kuyasana atarangirika.

Hari kandi inzitizi y’uko bamwe  mu bagenerwabikorwa bumva ko bagomba guhabwa inkunga kabone nubwo baba bishoboye cyane cyane mu buvuzi; abagenerwabikorwa badashaka kuva ku nkungay'ingoboka          kandi barateye intambwe iva mu cyiciro gihabwa iyi nkunga. Hari n’inzitizi z’abahabwa inkunga y'imishinga ibyara inyungu bakayikoresha nabi no kutita ku bibazo by'ubuzima bwo mu mutwe bw‘abagenerwabikorwa ku buryo buhagije. 

Muri iyi nama haganiriwe kandi ku bigenderwaho mu gufasha abatishoboye barokotse Jenoside yakorewe Abatutsi, ibyagezweho, inzitizi n'ingamba zo kunoza imitangire n'imicungire y'inkunga. Hanaganiriwe ku isano hagati y'ubuzima bwo mu mutwe n'imikoreshereze iboneye y'inkunga, urugendo rw'ubudaheranwa n’ubumenyi bw'ibanze mu gutegura no gucunga imishinga ibyara inyungu.