Mu Karere ka Huye habaye ibiganiro byahuje abahagarariye ibyiciro bitandukanye hagamijwe kuganira  ku bikorwa mu kurwanya ingengabitekerezo ya Jenoside no guteza imbere ubumwe n'Ubudaheranwa bw’Abanyarwanda.

Ni ibiganiro byabereye mu Karere ka Huye kuwa 04 Kamena 2025 byateguwe na Komisiyo y’Ububanyi n’Amahanga,Ubutwererane n’Umutekano mu Nteko ishinga amategeko umutwe wa Sena.

Senateri Ambasaderi RUGIRA Amandin na Senateri NYIRASAFARI Esperence bari muri iyo Komisiyo, hamwe n’Umuyobozi w’Akarere, ni bo byoboye ibi biganiro byitabiriwe n’abahagarariye ibyiciro bitandukanye mu Karere ka Huye. 

                                                                ^{Senateri Ambasaderi RUGIRA Amandin}

Ibi biganiro bikorwa mu turere dutandukanye byitezweho kongera imbaraga mu gushyira mu bikorwa ingamba zo kurwanya ingengabitekerezo ya Jenoside  no guteza imbere Ubumwe n’Ubudaheranwa bw’Abanyarwanda no gufata imyanzuro ku kurwanya ingengabitekerezo ya Jenoside no guteza imbere Ubumwe n’Ubudaheranwa bw’Abanyarwanda. 

Nk’uko biteganywa n’Itegeko Nshinga rya Repubulika y’u Rwanda mu ngingo yaryo ya 10, Leta y’u Rwanda yiyemeje kugendera ku mahame remezo no gutuma yubahirizwa.  Muri ayo mahame remezo harimo iryo gukumira no guhana icyaha cya jenoside, kurwanya ihakana n’ipfobya bya jenoside no kurandura burundu ingengabitekerezo ya jenoside n’ibyo igaragariramo byose. Hari kandi n’ihame remezo ryo kurandura burundu ivangura n’amacakubiri bishingiye ku bwoko, ku turere cyangwa ku kindi icyo ari cyo cyose, no gushyira imbere ubumwe bw’Abanyarwanda1. 

                                                                                ^{Senateri NYIRASAFARI Esperence}

Mu rwego rwo gukumira no guhana icyaha cya jenoside, kurwanya ihakana n’ipfobya bya Jenoside yakorewe Abatutsi no kurandura burundu ingengabitekerezo ya jenoside, u Rwanda rumaze gukora byinshi, birimo gushyiraho Politiki y’Ubumwe n’Ubwiyunge, amategeko ahana icyaha cya jenoside n’icy’ingengabitekerezo ya jenoside n’inzego zishinzwe kubishyira mu bikorwa. 

Politiki y’Ubumwe n’Ubwiyunge yo mu 2007, yavuguruwe mu 2020, ifite intego zirimo kurwanya amacakubiri n’ivangura iryo ari ryo ryose; kurwanya ingengabitekerezo ya jenoside, Politiki y’Ubumwe n’Ubwiyunge yo mu 2007, yavuguruwe mu 2020, ifite intego zirimo; gushishikariza Abanyarwanda mu nzego zose guharanira no guha agaciro ubumwe bwabo.

Mu nzego zashyizweho zishinzwe gukumira no kurwanya jenoside n’ingengabitekerezo yayo, harimo amahuriro y’ubumwe n’ubudaheranwa, imiryango iharanira inyungu z’abarokotse Jenoside yakorewe Abatutsi n’imiryango ishingiye ku myemerere yigisha umuco w’amahoro, ubumwe n’ubudaheranwa n’indi. 

Mu rwego rwo gushyira mu bikorwa Politiki y’Ubumwe n’Ubwiyunge, mu mwaka wa 2017 hashyizweho Ihuriro ry’ubumwe n’ubudaheranwa mu Karere, mu 2019 hashyirwaho n’Amabwiriza No 02/2019 yo kuwa 26/02/2019 agenga imikorere yaryo.

                                      ^{Abitabiriye igiganiro batanze ibitekerezo bitandukanye}