Abakozi bashinzwe ubutaka, ibikorwa remezo n’imiturire mu mirenge barahijwe ngo batangire inshingano zabo, bahabwa impanuro zo kuzuza neza inshingano zabo bakorana umutima nama, gushyira imbere inyungu rusange birinda ruswa n’akarengane.

Iki gikorwa cyo kubarahiza cyakorewe mu Karere ka Huye kuri uyu wa 05 Kamena 205. Impanuro zahawe abakozi batatu barahijwe n’Umuyobozi w’Akarere Sebutege Ange ashingiye ku bubasha yahawe na Minisitiri w’Ubutabera akaba n’Intumwa nkuru ya Leta. Indahiro yakiriye ni iz’abakozi  bashinzwe ubutaka, ibikorwa remezo n’imiturire mu mirenge ya Rusatira, Mbazi na Ruhashya.

Nyuma yo kwakira indahiro zabo, Umuyobozi w’Akarere yabahaye ubutumwa bubashishikariza gukora akazi birinda ruswa, bakimakaza gutanga serivise nziza ku baturage birinda kubasiragiza. Yasabye aba bakozi kurangwa no gukarana umutima nama, kurangwa n’indangagaciro, kwimakaza gushyira imbere inyungu rusange, gukunda akazi no kugakora mu buryo butanga impinduka nziza ku baturage.