Mu Karere ka Huye hatangiye imirimo y‘umushinga ugamije kugeza umuriro w’amashanyarazi mu bice bitandukanye byo mu Karere ka Huye. Ni imirimo izatanga akazi ku baturage batandukanye kandi ikazanazamura umubare w’ingo zigerwaho n’amashanyarazi.

Muri uyu mushinga munini hazagezwa amashanyarazi ku ngo zabaruwe 18,390 zo mu mirenge ya Rwaniro, Kinazi, Rusatira, Ruhashya , Simbi na Kigoma.

Abaturage bo muri iyi mirenge bafite ubutaka ahazacaimiyoboro y’amashanyarazi baraganirijwe kandi bemeranya ku bijyanye no guhabwa ingurane. Aba baturage bagaragaza ko bashimishijwe n’iyi mirimo yo kwagura umubare w’abagerwaho n’amashanyarazi.

Igipimo cyo kugeza amashanyarazi ku baturage mu Karere kiri kuri 74.8%. Biteganijwe ko uyu mushinga uzarangira igipimo cy’ingo zigerwaho n’amashanyarazi mu Karere ka Huye kigeze kuri 94%.