Ku rwibutso rwa Jenoside yakorewe Abatutsi rw’Umurenge wa Ngoma habereye igikorwa cyo kwibuka ku nshuro ya 29 Jenoside yakorewe Abatutsi, by’umwihariko ahazirikanwa abana n’abagore bishwe muri Jenoside.

Iki gikorwa cyabereye mu murenge wa Huye kuwa 28 Gicurasi 2023. Mu ijambo ry’Umuhuzabikorwa w’Inama y’igihugu y’Abagore mu Karere BAKUNDUKIZE Redempta yavuze ko Jenoside yakozwe hagamijwe gutsemba ubwoko bw’Abatutsi,abicanyi bakaba bataranagiriye impuhwe n’abana n’abagore. Yakanguriye ababyeyi “Kubaka ubumwe n’urukundo bishingiye kuri Ndi Umunyarwanda”.

Mu butumwa bwa Perezida wa Ibuka mu Karere ka Huye Siboyintore Theodat yavuze ku ngingo zirimo kwifuriza abarokotse gukomera muri iki gihe cyo kwibuka, kugaya abamennye amaraso y’Abatutsi muri Jenoside, kwibuka ni ubuzima,hakurwamo imbaraga zo kwanga ikibi no kwiyemeza ko Jenoside itazagaruka ukundi, ushimira ubuyobozi bwiza bushakira ineza Abanyarwanda bose, gusaba ko urukundo rwaranga Abanyarwanda, kugaragaza ko kwibuka Jenoside yakorewe Abatutsi  ari inshingano z’abanyarwanda bose, n’uko gukora ibyiza byaranga Abanyarwanda.

Umuyobozi w’Akarere SEBUTEGE Ange yavuze ko mu kwibuka “Twiyemeza ko Jenoside itazongera kuba ukundi”. Yavuze ko Ababyeyi batanga ubuzima n’abana baka ari aheza h’Igihugu. Bityo yanenze ababishe muri Jenoside yakorewe Abatutsi kandi agaragaza ko kubibuka bizahoraho.

Umuyobozi w’Akarere ka Huye yashimye ingabo za RPA zahagaritse Jenoside zikagarura ubuzima mu gihugu. Yanashimye abitaye ku mfubyi n’abapfakazi ba Jenoside, asaba ababyeyi gutoza abana kurangwa n’Urukundo, kugira impuhwe, kubabarira, kurangwa n’ubumwe.

Umuyobozi w’Akarere yahamagariye urubyiruko kwamagana ababyeyi bafite ingengabitekerezo ya Jenoside banayihembera mu rubyiruko. Yasabye abitabiriye igikorwa cyo kwibuka guharanira kubaka igihugu buri wese afite amahirwe angana n’aya mugenzi we.

Depite Prof. Omar Munyaneza yahamagariye urubyiruko kwirinda ko amateka mabi yazongera kuba. Yagize “Muzakomeza kuba imbarutso mugashyigikira Leta yacu ko ibyabaye bitazongera kuba ukundi […] Twizera ko mwe muzafata ingamba mukaba mutashukwa kugeza kuri kiriya kigero”.

Depite Munyaneza yahamagariye abitabiriye igikorwa cyo kwibuka kurwanya abagihembera ingengabitekerezo ya Jenoside. Yagaragaje ko hashyizweho amategeko ahana Jenoside n’ingengabitekerezo. Yasabye Abanyarwanda gushyira hamwe mu kwimakaza Ndi Umunyarwanda.

Igikorwa cyo kwibuka abana n’abagore gisojwe no gutura indabo imibiri ishyinguye mu rwibutso rwa Jenoside rw’umurenge wa Ngoma no kubunamira.