Mu murenge wa Ngoma mu Karere ka Huye hizihijwe Umuganura w’abana, ubera ku Ngoro y'Umurage w'Amateka y'Imibereho y'Abanyarwanda. Ni igikorwa cyitabiriwe n’abana mu bgeri zitandukanye barimo abitabiriye gahunda y’abana mu biruhuko mu ngoro z’umurage.

 Uyu muganura wizihijwe kuwa gatanu tariki ya 29 Kanama 2025. Mu ijambo rye, uhagarariye ababyeyi bafite abana bitabiriye gahunda y’abana mu biruhuko mu ngoro z’umurage, Bwana MURENZI Albert yashimiye intekoyUmuco yateguye iyi gahunda ndetse ikanashyiriraho abana umwanya wo kwizihiza umuganura wabo, yaboneyeho gusaba ko iyi gahunda yagumaho kandi ibyo abana bigishijwe bigakomeza gushyigikirwa bashyirirwaho amarushanwa ajyanye n’uUmurage ndangamuco batozwa mu mpande zose z’igihugu.

Akayo Carla Maela uhagarariye abana bitabiriye gahunda y’ibiruhuko mu ngoro z’umurage muri uyu mwaka, yashimiye ubuyobozi bw’igihugu budaheza abana, bakabaha umwanya bakiga umuco nyarwanda. 

Akayo yasabye ababyeyi ko bakomeza gushyigikira uburezi bw’abana bashyigikira gahunda yo kugaburira abana ku ishuri izwi nka “Dusangire Lunch” ndetse no kuzakomeza kubafasha kwitabira iyi gahunda.

Hahembwe abana bitwaye neza bagatsinda amarushanwa ku nkoranabuhanga ya terefoni yigisha Ikinyarwanda yitwa “TUMENYE IKINYARWANDA”, aya marushanwa yateguwe ku bufatanye n’Urwego rw’Igihugu rushinzwe Uburezi bw’Ibanze (REB) n’IntekoyUmuco mu gihe cy’ibiruhuko.

Abana batsinze aya marushanwa bane ba mbere ku rwego rw’igihugu bahembwe mudasobwa ngendanwa (Laptops), ibitabo n’icyemezo cy’ishimwe.

Mu ijambo ryo gusoza Umuganura w’abana 2025, Intebe y’Inteko Amb.Robert Masozera yashimiye abafatanyabikorwa bose bakomeje kugira uruhare muri iki gikorwa kikaba gikomeje kwaguka ndetse yemeza ko kizakomeza.

Mu ijambo rye kandi yagarutse ku bushakashatsi #IntekoyUmuco yakoze ku murage ndangamuco w’u Rwanda, yagaragaje ko ubwo bushakashatsi bwerekanye ko abanyarwanda bangana na 88% ari bo bazi indangagaciro z’umuco nyarwanda mu gihe abangana na 66.8% ari bo bonyine batozwa indangagaciro z’umuco nyarwanda mu muryango. Ubu bushakashatsi kandi bwagaragaje ko indangagaciro yo kwiyubaha no kwihesha agaciro biri mu ndangagaciro z’umuco abanyarwanda bagenda bateshukaho.

Yisunze ubu bushakashatsi yakanguriye ababyeyi n’abafatanyabikorwa kugira uruhare mu kuzamura ibi bipimo hagamijwe kubaka umuryango nyarwanda ugendera ku ndangagaciro z’umuco.

Umuganura w’abana 2025 wasojwe no gusura ibyo abana bigishijwe gukora  muri gahunda y’abana mu biruhuko mu ngoro z’umurage harimo imyuga gakondo n'ibindi.