Abayobozi b’ibigo by’amashuri yo muri Diyosezi Gatolika ya Butare basabwe gusigasira uburezi gatolika, kubukunda kandi bikagaragarira bose. Banasabwe kandi kurangwa n’ubwuzuzanye, ubufatanye mu burezi bakora, gusangira ibyiza bafite, kwigiranaho no kugirana inama.

Ni inama yateraniye mu Karere ka Huye kuwa 31 Mutarama 2025 ihuza abayobozi b’ibigo by’amashuri gatolika yo muri Diyosezi ya Butare, iyoborwa na Musenyeri Jean Bosco Ntagungira umwepisikopi wa Diyosezi Gatolika ya Butare. 

Mu butumwa bwe, yasabye abayobozi b’ibigo by’amashuri gusigasira uburezi gatolika, kubukunda kandi bikagaragarira bose. 

Musenyeri Jean Bosco Ntagungira yasabye abayobozi b’ibigo by’amashuri gatolika kugira urukundo rw’umurimo bakora, kwishakamo urwo rukundo hagati yabo n’abo bakorana, urukundo rwitanga kuko rushobora no kukubabaza kandi rukaba rwanagushimisha. Yabasabye kugira iyo passion kandi bakayigeza kubo bakorana. Ati ”Tugomba kugira (passion) urukundo rw’uburezi dukora. Ayo marangamutima akagaragara hose no kuri bose. Mukagira impanuro y’ubutabera, ubuvandimwe n’urukundo. Kandi mukarinda isura y’ishuri, ari nacyo ababyeyi bifuza.”

Umuyobozi w’akarere ka Huyewungirije ushinzwe imibereho myiza y’abaturage Kankesha Annoncithe yibukije abayobozi b’ibigo by’amashuri gatolika ko Huye yahisemo gukomeza kuba igicumbi cy’uburezi. Yabasabye ubwuzuzanye, ubufatanye mu burezi bakora ,gusangira ibyiza bafite, kwigiranaho no kugirana inama.

Ati “Murasabwa kwitanga inshuro ebyiri, gukunda ibyo mukora, kunoza imikorere n’imikoranire no guteza imbere uburezi. Tujye inama tugishe inama kandi birashoboka dufatanyije.“

Kankesha yibukije abayobozi b’ibigo by’amashuri gahunda yo guhanga udushya, gushinga club zo gufashanya mu mashuri hagamijwe kwishakamo ibisubizo bizafasha bamwe mu bana bafite ibibazo by’ubukene ku ishuri. Yagize ati ”Ubufatanye ni ingenzi, kugira inshuti z’uburezi n’abajyanama b’uburezi.kuko uburezi bwacu ari umuhamagaro urenze indi.”

Diyosezi ya Butare ifite ibigo by’amashuri gatolika 162, birimo amashuri abanza, ayisumbuye na Kaminuza.

Iyi nama yanitabiriwe kandi n’abayobozi b’Akarere bungirije bashinzwe imibereho myiza bo mu turere twa twa Huye, Gisagara na Nyaruguru.