Abarokotse Jenoside yakorewe Abatutsi n'abayigizemo uruhare bibumbiye mu matsinda y'Ubumwe n'Ubudaheranwa mu Karere ka Huye, bagaragaza ko Inka y'Ubumwe n'Ubudaheranwa borozanya hagati yabo irushaho gukomeza ubumwe bafitanye ndetse ikabafasha no mu mibereho myiza.

Mu rugo kwa Kayitare Jean de Dieu utuye mu Kagali ka Tare mu Murenge wa Mbazi, yagize uruhare muri Jenoside, afunguwe ajya mu itsinda. 

RBA yasanze arimo kwita ku nka yorojwe, kuri we avuga ko kubona inka bwa mbere mu itsinda iturutse no mu bo yahemukiye ngo bishimangira imbabazi yahawe.

Mukamuhoza Solange warokotse Jenoside yakorewe Abatutsi n’abandi babana mu matsinda y’Ubumwe n’Ubudaheranwa, bemeza ko uku korozanya inka bizarushaho gushimangira ubumwe bafitanye bikabafasha no kwiteza imbere hatagize usigara inyuma muri bo kuko ari gahunda izakomeza.

Iyi gahunda yo korozanya Inka mu matsinda y'Ubumwe n'Ubudaheranwa imaze umwaka  itangijwe mu Karere ka Huye.

Iyi gahunda yiyongereye ku bikorwa byari bisanzwe kugira ngo ubumwe burusheho gushinga imizi bitewe n'agaciro k'inka mu muryango Nyarwanda. 

Umuyobozi w'Akarere ka Huye, Ange Sebutege avuga ibikorwa byiza abari muri aya matsinda bakora, biri muri politike y'Igihugu yo kubumbatira ubumwe bw'Abanyarwanda.

Avuga ko iriya nka irushaho kubfasha guhana igihango ariko no kurwanya ubukene.

Gahunda y'inka y'ubumwe n'ubudaheranwa imaze kugera mu mirenge 4, imiryango 8 ikaba imaze korozwa iyi nka y’ubumwe n’ubudaheranywa.

Mu Karere ka Huye hari amatsinda 38 y'ubumwe n'ubudaheranwa.

Ivomo: RBA