Mu murenge wa Karama habaye igikorwa cyo kwibuka ku nshuro ya 31 Jenoside yakorewe Abatutsi muri uyu murenge. Muri iki gikorwa hashyinguwe mu cyubahiro imibiri 12 y’abazize Jenoside yabonetse. Iki gikorwa cyitabiriwe n’abayobozi barimo Abasenateri n’Abadepite.

Iki gikorwa cyabereye mu murenge wa Karama kuwa 21 Mata 2025. Mu butumwa bwa Senateri Antoine Mugesera yasabye ababyeyi gusobanurira abana amateka mu buryo butagoretse. ⁠Yasobanuye uko abakoloni baciyemo ibice Abanyarwanda bifashishije amoko, kandi mbere Abanyarwanda bari bunze ubumwe, bose baritwaga “Benekanyarwanda”. 

Dr NTAGANIRA Vincent uhagarariye umuryango IBUKA yagaragaje ko kwibuka ari igikorwa cy’ingenzi kandi cy’ubupfura, agaragaza ko kwibuka Jenoside yakorewe Abatutsi ari inshingano za buri Munyarwanda wese. Yasabye abarokotse Jenoside gukora cyane bakibuka biyubaka, bagakomeza kurangwa n’indangagaciro zo kwiyubaha no kubahisaha abishwe.

Dr Ntaganira yashimye ubutwari bw’Inkotanyi zahagaritse Jenoside yakorewe Abatutsi amahanga arebera, agaragaza ko abarokotse Jenoside n’Abanyarwanda muri rusange bafitanye igihango n’Inkotanyi. Yasabye ko hamaganwa abakaka bakanapfobya Jenoside yakorewe Abatutsi, asaba kwirinda icyo ari cyo cyose cyahembera amacakubiri, himakazwa Ndi umunyarwanda, icyomoro cy’Abanyarwanda.

Dr Ntaganira yagaye Leta yateguye Jenoside yakorewe Abatutsi; ashima Leta y’Ubumwe bw’Abanyarwanda ku bikorwa byiza yakoze mu kubaka Imiryango y’Abarokotse Jenoside yakorewe Abatutsi. 

Senator Prof DUSINGIZEMUNGU Jean Pierre yashimye Inkotanyi zahagaritse Jenoside, akomeza abarokotse Jenoside. Yakanguriye Abanyarwanda kugira icyizere cyo kubaho. Yagaragaje ibikubiye mu irangashingiro ry’itegekoshinga; agaragaza ko ubumwe, umutekano n’amahoro ari umusingi w’iterambere no kubahiriza uburenganzira bwa muntu.

Muri iki gikorwa hashyinguwe mu cyubahiro mu rwibutso rwa Karama imibiri 12 yabonetse.