Mu gikorwa cyo kwibuka ku nshuro ya 29 Jenoside yakorewe Abatutsi mu murenge wa Karama, Minisitiri w’Ubumwe bw’Abanyarwanda n’inshingano mboneragihugu (MINUBUMWE) yashimye Leta y’Ubumwe yatanze umwanya wo kwibuka Jenoside yakorewe Abatutsi. Yagaragaje ko Abanyarwanda bafite inshingano yo kurinda ubuzima no kuburengera mu buryo bwose. 

Igikorwa cyo kuwa 21 Mata 2023 cyo kwibuka ku nshuro ya 29 Jenoside yakorewe Abatutsi mu murenge wa Karama cyitabiriwe n’inzego zinyuranye zirimo Minisitiri wa MINUBUMWE, bamwe mu bagie Inteko ishing amategeko, ubuyobozi bwa IBUKA, Akarere ,…

Mu ijambo ry’ikaze ahaye abitabiriye igikorwa cyo kwibuka, Umuyobozi w’Akarere wungirije ushinzwe iterambere ry’ubukungu KAMANA André yashimye ko imibereho y’abarokotse Jenoside yakorewe Abatutsi ikomeje kwitabwaho binyuze muri gahunda zirimo amacumbi, uburezi, …

AHISHAKIYE Naphtal, Umunyamabanga Nshingwabikorwa wa IBUKA yavuze ko kwibuka ari umwanya womora Abarokotse. Ati: “Kwibuka ni umwanya twongera gusangira amateka mabi yaranze Igihugu ndetse no gufata ingamba zo guhangana n’ingaruka za Jenoside no kwiyemeza ko itazongera kuba ukundi.”

Ashingiye ku myaka yashize Abatutsi bageragerezwaho Jenoside, AHISHAKIYE yagaragaje ko Abatutsi bishwe barangwaga n’indangagaciro yo kwihangana, gukunda umurimo no gukunda Igihugu, kandi izo ndangagaciro bakazitoza abana babo. Bityo asaba abantu kurangwa n’indangagaciro nziza. AHISHAKIYE yamaganye abakirangwa n’ingengabitekerezo ya Jenoside, anasaba ko imanza zabo zajya ziciribwa ahakorewe icyo cyaha. 

Minisitiri BIZIMANA yagaragaje uko Leta yigishije ko Umututsi ari umwanzi w’u Rwanda binashyirwa muri politiki y’Igihugu. Yanenze iyo leta mbi itarasaranganyaga ibikorwa by’iterambere mu gihugu hose. Yerekanye amwe mu mateka y’uko Leta y’Abatabazi yakanguriye abahutu kwihutisha Jenoside.

Minisitiri BIZIMANA yashimye Leta y’Ubumwe yatanze umwanya wo kwibuka Jenoside yakorewe Abatutsi. Yagaragaje ko Abanyarwanda bafite inshingano yo kurinda ubuzima no kuburengera mu buryo bwose. Yagaragaje ko urubyiruko rukwiye kujya rwigishwa amateka ya Jenoside yakorewe Abatutsi

Minisitiri BIZIMANA yashimye Leta nziza yatanze ikizere cyo kubaho ku banyarwanda bose nta kuvangura. Yifurije abarokotse Jenoside kudahungabana,ahubwo bakarangwa no kwigirira icyizere. Yavuze ko Leta izi ibibazo by’abarokotse kandi izakomeza kubikemura uko ubushobozi buboneka.

Igikorwa cyo kwibuka Jenoside yakorewe Abatutsi mu murenge wa Krama cyasojwe no  gushyingura mu cyubahiro imibiri 2.

Urwibutso rwa Karama rushyiguyemo imibiri y’Abatutsi bishwe muri Jenoside irenga ibihumbi 75.