Mu cyahoze ari Komini Kinyamakara mu murenge wa Kigoma habaye igikorwa cyo kwibuka ku nshuro ya 31 Jenoside Yakorewe Abatutsi. Ni igikorwa cyakozwe kuwa 13 Mata 2025, cyitabiriwe n’abayobozi mu nzego zitandukanye ndetse n’abaturage baturutse mu bice bitandukanye.

Mu ijambo ry'ikaze ryatanzwe n’Umuyobozi w’Akarere Sebutege Ange yihanganishije anakomeza abarokotse Jenoside yakorewe Abatutsi, agaruka ku kamaro ko Kwibuka Jenoside yakorewe Abatutsi. Yashimye intambwe y'ubumwe n'ubudaheranwa imaze guterwa, anashima ingabo za RPA zahagaritse Jenoside yakorewe Abatutsi, hakimikwa Ndi umunyarwanda. Umuyobozi yasabye ko abazi ahajugunywe imibiri y’abazize Jenoside ko bayigaragaza bagashyingurwa mu cyubahiro.

Guverineri w'Intara y'Amajyepfo yitabiriye igikorwa cyo kwibuka Jenoside Yakorewe Abatutsi mu murenge wa Kigoma

Perezida wa IBUKA mu karere ka Huye Siboyintore Theodate na Guverineri w’Intara y’Amajyepfo Alice Kayitesi wari umushyitsi mukuru muri iki gikorwa, batanze ubutumwa bwo gukomeza abarokotse Jenoside yakorewe Abatutsi, bashima intamwe yatewe mu bumwe n'ubudaheranwa n'iterambere rimaze kugerwaho kubera imiyoborere myiza. 

Bashimye Leta yitaye ku mibereho y’abarokotse Jenoside kandi bagaragaza ko Leta izakomeza kubitaho. Basabye ko abafite amakuru ku hari imibiri y'abazize Jenoside yakorewe Abatutsi bayatanga iyo mibiri igashyingurwa mu cyubahiro bakwiye. 

Mu butumwa bwabo kandi basabye kwamagana abagihakana n’abapfobya Jenoside kimwe n'abagifite ingengabitekerezo ya Jenoside.

Muri iki gikorwa cyo kwibuka ku nshuro ya 31 Jenoside Yakorewe Abatutsi mu mirenge ya Simbi na Maraba hashyinguwe mu cyubahiro umubiri umwe wabonetse. Iki gikorwa cyasojwe no gutura indabo abaruhukiye mu rwibutso rwa Jenoside yakorewe Abatutsi rw'Umurenge wa Kigoma.