Mu gusoza ubukangurambaga bw’iminsi 16 yo kurwanya ihohotera, ababwitabiriye bibukijwe ko nta terambere ryashoboka mu gihe ingo zibanye mu makimbirane, bityo basabwa guharanira kubaka umuryango ushoboye kandi utekanye izira ihohotera.

Ni ubutumwa bwatanzwe na Sebutege Ange, Umuyobozi w’Akarere kuwa 10 Ukuboza 2024 mu Kagari ka Matyazo mu murenge wa Ngoma, mu gikorwa cyo gusoza ku rwego rw'Akarere ubukangurambaga bw'iminsi 16 yo kurwanya ihohotera rishingiye ku gitsina no kwimakaza ihame ry’uburinganire.

Umuyobozi w’Akarere sebutege yasabye ko haharanirwa kuba aumuryango utekanye. Yagize ati “Ni gahunda nziza ikwiye kuba ubuzima bwa buri munsi, kuko no mu itegeko nshinga dufite no ingingo ivuga ko ‘Umuryango ari wo shingiro ry’iterambere’.”

Umuyobozi w’Akarere yasabye abitariye gukemura ibibazo byose bikibangamiye umuryango, ati “Duhurize hamwe imbaraga dukemure ibibazo biri mu miryango bishingiye ku mibanire mibi, twubake umuryango uzira ihohotera […] kurwanya igwingira mu bana, guca amakimbirane, kurwanya ikibazo cy’abangavu baterwa inda zitateganijwe, kwandikisha abana mu irangamimerere; kubana ku miryango yarasezeranye byemewe n’amategeko, guca imirire mu bana.”

Umuyobozi w’Akarere ysabye ko hakomeza kumvikana neza ihame ry’uburinganire, agira at “⁠Igihugu cyadushyiriyeho amategeko adaheza, anganya abantu […] kumva iri hame ry’uburinganire n’ubwuzuzanye bikwiye gushingira kumva ko ntawe uruta undi imbere y’amategeko.”

Umuyobozi w’Akarere yagaragaje ko nta terambere ry’umuryango ubna mu makimbirane rishoboka, asaba ko harwanywa amakimbirane. Yagize ati  “Nta rugo rwatera imbere ruri mu makimbirane. Twese duharanire kugira umuryango uzira ihohotera, ibi bigasaba uruhare rwa buri wese mu bagize umuryango yaba umugore cg umugabo.”

Yagaragaje ko ubuyobozi buzakomeza ubufatanye mu bikorwa byo guharanira kubaka umuryango utekanye harimo guhugura abantu amategeko, ubukangurambaga ku kwimakaza ibiganiro mu ngo; gukorana n’izindi nzego nk’inshuti z’umuryango mu guhugura imiryango ku mibanire,… Yasabye abaturage gutanga amakuru ahakiri ihohotera.

Ubu bukangurambaga bw'iminsi 16 bukorwa kuva kuwa 25 Ugushyingo kugera kuwa 10 Ukuboza buri mwaka. Uyu mwaka bwakozwe kuri iyi nsanganyamatsiko: "Umuryango uzira ihohotera", hagamijwe gushimangira ihame ry’uburinganire, ubwuzuzanye no kwimakaza kubaka umuryango uzira ihohotera.