Mu murenge wa Rusatira hatashywe umuyoboro w’amazi meza ureshya na 1.5 Km wubatswe muri gahunda y'ibikorwa by'ubufatanye bw'inzego z'umutekano n'abaturage.

Uyu muyoboro watashywe wuzuye utwaye asaga miliyoni 15 z’amafaranga y’u Rwanda. Uyu muyoboro ugeza amazi ku ngo zirenga 280 n’ishuri ribanza rya Mugogwe rifite abanyeshuri barenga 1,000.

Ubuyobozi bw’iri shuri rya Mugogwe bugaragaza ko kutagira amazi byabagiragaho ingaruka zirimo no kudategurira ku gihe amafunguro y'abanyeshuri. 

N'abaturage baturanye n'iri shuri bahawe ivomero bashima ko begerejwe amazi, bityo bakazarushaho kwiyitaho mu isuku rusange no kunywa amazi meza.

Umuyobozi w'Akarere Sebutege Ange yashimiye inzego z'umutekano zagize uruhare mu iyubakwa ry'uyu muyoboro n'abaturage batanze umuganda muri iki gikorwa. 

Yasabye abashyikirijwe uyu muyoboro kuwufata neza, ukarusho kubagirira akamaro no gukomeza kubungabunga ibindi bikorwa remezo.