Ubukangurambaga bw’iminsi 16 yo kurwanya ihohotera rishingiye ku gitsina burakomeje mu Karere ka Huye. Ni muri urwo rwego Umuyobozi w’Akarere yashyingiye imiryango 27 mu murenge wa Rwaniro yabanaga mu buryo budakurikije amategeko.

Iyi miryango yasezeranye byemewe n'amategeko kuwa 26 Ugushyingo 2025 yishimiye gusangira ibyishimo n'Ubuyobozi, kandi yiyemeza kutazasubira inyuma mu ntambwe bateye yo kubaka imiryango izira ihohotera iryo ari ryo ryose. 

Muri iki gikorwa cy’ubukangurambaga bwo kubaka umuryango uzira ihohotera, Umuyobozi w’Akarere yatanze ubutumwa bushishikariza imiryango gukora no kwiteza imbere, bagaharanira ibiteza imbere imiryango yabo. 

Mu rwego rwo gufasha imiryango kwiteza imbere no kurwanya ubukene bwagira uruhare mu ihohotera, mu Murenge wa Rwaniro horojwe imiryango 4 inka. Imiryango yorojwe yanahawe imiti y'ibanze y'inka.

Muri uyu murenge hanashimiwe Inshuti z’Umuryango zagaragaje uruhare mu kubaka imiryango ituje, itekanye, yasohotse mu makimbirane.