Mu kagali ka Mwendo ahubatswe urwibutso rw’Umurenge ni ho habereye igikorwa cyo kwibuka ku nshuro ya 29 Jenoside yakorewe Abatutsi muri uyu murenge, hanashyingurwa mu cyubahiro imibiri 10.

Iki gikorwa cyabaye kuwa 23 Mata 2023 cyitabiriwe n’abayobozi barimo Senateri NKURUNZIZA Innocent n’abandi bayobozi mu nzego zitandukanye.

Veneranda TANGIMPUNDU watanze ikiganiro ku mateka ya Jenoside yakorewe Abatutsi, yasabye abitabiriye kwibuka gushyira imbere ubumwe nk’Abanyarwanda.

Yasabye ko urubyiruko rwigishwa amateka,mu miryango Ababyeyi bakabwiza ukuri abana ku mateka y’u Rwanda babatoza gukunda Igihugu.

TANGIMPUNDU yasabye abitabiriye kwibuka Jenoside yakorewe Abatutsi kwimakaza umuco w’amahoro, kwamagana ingengabitere ya Jenoside no kwirinda guheranwa n’amateka mabi banyuzemo ahubwo buri wese akiyubakamo imbaraga zo guhangana na yo. Yabasabye kwimika ubudaheranwa.

Umuyobozi w’Akarere wungirije ushinzwe iterambere ry’Ubukungu KAMANA André yahumurije abarokotse Jenoside yakorewe Abatutsi. Yagaragaje ingaruka za Jenoside yakorewe Abatutsi haba ku ruhande rw’Abatutsi bicwaga ndetse n’abakoze Jenoside, bityo asaba kwamagana urwango.

KAMANA yasabye abarokotse Jenoside gukoresha imbaraga zidasanzwe mu kwiyubaka baharanira kusa ikivi cy’ababo bishwe,no kwiremamo icyizere cy’ubuzima. Yahamagariye abitabiriye kwibuka kwimakaza ubumwe n’ubwiyunge, ati:”Tugire urukundo, turangwe n’ubumwe n’ubwiyunge.”

Senateri Innocent NKURUNZIZA, mu butumwa bwe, ati: “Twibuke twiyubakamo imbaraga zo kudaheranwa n’agahinda, ibikomere n’ingaruka za Jenoside, ahubwo twibuke twiyubaka.” Yagaragaje akamaro ko kwibuka, avuga ko “Kwibuka ni inshingano yacu nk’Abanyarwanda twese”.

Senateri NKURUNZIZA yagaragaje ko mu itegekonshinga hashyizwemo amahame remezo 6 arwanya ivangura iryo ari ryo ryose, Jenoside n’ingengabitekerezo yayo n’ibyo yagaragariramo byose, gushakira hamwe ibyubaka Igihugu buri wese afitemo amahirwe angana na ya mugenzi we.

Yanenze politiki mbi yigishije urwango n’ivangura mu banyarwanda, himikwa ingengabitekerezo ya Jenoside. Yashimye ubutwari bw’Inkotanyi zahagaritse Jenoside zikagarura amahoro &Umutekano mu gihugu. Ati: “Twese dusabwa kujya mu murongo umwe w’uko turi abavandimwe”

Igikorwa cyo kwibuka Jenoside yakorewe Abatutsi mu murenge wa Rwaniro gisojwe no gushyingura mu cyubahiro imibiri 10 no gutura indabo abashyinguye mu rwibutso rwa Mwendo. Uru rwibutso rushyiguyemo imibiri 3,519 y’Abatutsi bishwe muri Jenoside.