Urugaga rw’abikorera ku rwego rw’Akarere ka Huye rwasinyanye n’Akarere ka Huye amasezerano y’ubufatanye ndetse n’imirenge isinyana n’uru rugaga ku rwego rw’Umurenge.

Aya masezerano y’imikoranire yasinywe kuwa 12 Ukwakira 2025, ashyirwaho umukono na Butera Bagabe Gervais, umuyobozi w’urugaga rw’abikorera mu Karere ka Huye ndetse n’Umuyobozi w’Akarere Sebutege Ange. 

Muri iki gikorwa kandi, abanyamabanga Nshingwabikorwa b’Imirenge basinyanye n’abahagarariye Urugaga rw’abikorera ku rwego rw’Imirenge. 

Umuyobozi w’Akarere yashimye uruhare abikorera bagira mu iterambere ry’Akarere, haba mu kubaka ibikorwa remezo bigira uruhare mu guhanga umurimo, imisoro n’amahoro bigira uruhare mu iterambere ry’Igihugu, ubufatanye mu bikorwa by’iterambere ry’abaturage n’ibindi.

Hagaragajwe ko aya masezerano y‘ubufatanye azakomeza gushimangira imikoranire myiza hagati y’Akarere n’uru rwego ndetse n’imirenge. Abagize urwego rw’abikorera mu Karere biyemeje gukomeza ubufatanye mu kuzamura Akarere binyuze cyane cyane mu gukora imishinga minini igaragaza impinduka zifatika mu Karere by’umwihariko mu guteza imbere Umujyi wa Huye.

Umuyobozi w'Akarere ka Huye Sebutege Ange

Umuyobozi wa PSF mu Karere BUTERA BAGABE Gervais