Kimwe no mu tundi turere tw’Igihugu, Mu Karere ka Huye hizihijwe umunsi mpuzamahanga w’abafite umubumga, hashimwa umusanzu abafite ubumuga bagira mu iterambere ry’imiryango yabo n’iry’Igihugu muri rusange.

Ibirori byo kwizihiza uyu munsi byakorewe mu mirenge yose kuwa 03 Ukuboza 2024. Ku rwego rw’Akarere byakorewe mu murenge wa Rusatira, ahizihirijwe ku rwego rw’Akarere umunsi mpuzamahanga w’abantu bafite kuri iyi nsanganyamatsiko: “Kuzamura uruhare rw’abantu bafite ubumuga mu miyoborere, twubaka ejo heza”.

Ni igikorwa cyitabiriwe n’ubuyobozi bw’Akarere n’abafatanyabikorwa banyuranye.

Umuhuzabikorwa w’Inama y’Igihugu y’abantu bafite ubumuga mu Karere Tuyisabe Theoneste yavuze ko bishimira ko himakajwe politiki zidaheza, abafite ubumuga bakaba bafatanya n’abandi mu bikorwa by’iterambere ry’Igihugu. 

Yashimye abafatanyabikorwa bafatanya n’Akarere mu guteza imbere imibereho myiza y’abantu bafite ubumuga, biityo agaragaza ko abafite ubumuga bakomeje gahunda nziza yo kwiteza imbere bafatanyije n’umuryango nyarwanda muri rusange. 

Tuyisabe yashimye ko abafite ubumuga bavanywe mu bwigunge hashyirwaho amakipe yabafite ubumuga mu mikino itanduaknye, aboneraho ⁠gushishikariza abafite ubumuga gukora ibikorwa bitandukanye bibateza imbere birimo n’imyuga.

Umuyobozi w’Akarere Sebutege Ange yavuze ko Akarere kazakomeza gukemura imbogamizi zose abafite ubumuga bahura nazo. Yavuze kandi ko hazakomeza gushyigikirwa impano z’abafite ubumuga; abasaba kumva ko bashoboye no kwigirira icyizere. Umuyobozi w’Akarere yashimye umusanzu abafite ubumuga bagira mu iterambere ry’imiryango yabo n’iry’Igihugu muri rusange.

Yagaragaje ko abafite ubumuga bagira uruhare mu miyoborere mu bufatanye n’abandi banyarwanda bose. Yagize ati: ”⁠Igihugu cyari twiyemeje gushyira umuturage ku isonga, abafite ubumuga bakaba badasigara inyuma muri politiki nziza z’igihugu zidaheza [….] ubuyobozi bw’Akarere bwiteguye gukomeza gufatanya n’abafite ubumuga mu gekemura imbogamizi zose bahura na zo.”

Abafite ubumuga 47 bize imyuga bahawe ibikoresho birimo iby’ubudozi; ⁠gusudira; kuboha; ubukanishi; kubaka; gukora inkweto.