Mu mirenge yose y’Akarere ka Huye hizihijwe umunsi mpuzamahanga ngarukamwaka wahariwe umugore wo mu cyaro. Mu murenge wa Karama, akagari ka Bunazi, mu mudugudu w’Akarehe ni ho hizihirijwe ku rwego rw’Akarere uyu munsi kuri iyi nsanganyamatsiko: “Umugore ni uw’agaciro”.

Umunsi mpuzamahanga w’umugore wo mu cyaro wizihijwe kuwa 15 Ukwakira 2025. Igikorwa cyo kwizihiza uyu munsi cyitabiriwe n’Umuyobozi w’Akarere Sebutege Ange, abo mu nama y’Igihugu ku rwego rw’Igihugu n’Akarere, abafatanyabikorwa batandukanye n’abandi bayobozi.

Muri iki gikorwa cyo kwizihiza umunsi mpuzamahanga w’umugore wo mu cyaro, abagore biteje imbere bashimiwe umuhate wabo mu iterambere ry'umuryango ndetse no kubera urugero abandi ko kwikura mu bukene bishoboka. Bashimiwe bahabwa ibirimo inka, gaz na matelas.

Hishimiwe umusaruro w'ibikomoka mu buhinzi n'ubworozi, nk'imwe mu mirimo iteza imbere umugore wo mu cyaro.

Abagore basabwe  kurushaho kunoza ubuhinzi n'ubworozi bakabikora kinyamwuga, mu rwego rwo kongera umusaruro mu bwiza no mu bwinshi, hagamijwe kwitez imbere no guteza imbere imiryango yabo. 

Uwimbabazi Appolonie ni umugore wo mu murenge wa Karama witeje imbere binyuze mu butubuzi bw’imbuto y’ibirayi. Avuga ko yafashije abana be kubahangira umurimo.

Yahaye akazi abaturage barenga 20 ndetse akaba ageze ku mutungo urenga miliyoni 50 z’amafaranga y’u Rwanda.