Kuwa 19 Mutarama 2023, Umuyobozi mukuru w’ikigo gishinzwe ubuhinzi n’Ubworozi (RAB) Dr Karangwa Patrick yasuye ibikorwa binyuranye mu Karere ka Huye, ashima intambwe abahinzi borozi bamaze kugeraho, abasaba gukomeza guteza imbere ibikorwa byabo.

Mu murenge wa Tumba yasuye  aborozi ntangarugero bo mu Murenge wa Tumba, Akagari ka Cyarwa, Umudugudu wa Agasharu, barimo Munyurangabo Leopold, Karangwa Eric na Muhayimana Vincent.

Dr Karangwa yasuye kandi abahinzi bibumbiye muri KORIMAMU, koperative ihinga umuceri mu gishanga cya Mukura. Umuyobozi Mukuru wa RAB yasabye abahinzi guhinga imbuto yizewe no guhashya indwara zitubya umusaruro babifashijwemo na RAB/sitasiyo ya Rubona na serivisi zishinzwe ubuhinzi mu Karere

Dr Karangwa yasuye KOAGIMPA, koperative y’Abahinzi b'ibigori mu gishanga cya Mpaza gifite ubuso bungana na hegitari 59.9, gikora ku Mirenge ya Mukura na Tumba.

Umuyobozi Mukuru wa RAB yashimiye abahinzi intambwe bateye mu gukora ubuhinzi bugamije isoko; yabashishikarije gukoresha ibisigazwa bw’ibikomoka ku bihingwa mu gukora ifumbire y’imborera yifashishwa mu kunganira ifumbire mvaruganda hagamijwe kongera umusaruro kuri hegitari. Yanabasezeranije kubegereza ubwoko bushya bw'imbuto nziza y'ibishyimbo bahinga basimburanya n'ibigori, anabasezeranya ubufasha bwa Leta mu kwiyubakira ubwanikiro bw'umusaruro.

Ubutumwa yanyujije kuri Twitter:

“Nishimiye kubona aborozi nasuye uyu munsi mu murenge wa Tumba mu Karere ka Huye bariyubakiye ibigega munsi y'ubutaka, bya litiro 30,000 buri kimwe, bifata amazi ava ku mireko. Kimwe cyubakwa ku Frw 1,500,000. Nkunganire ya Leta iguha 50% no muri ibi!

“Ikigega nk'iki cyubatse munsi y'ubutaka, gifata amazi y'imvura anyura mu mireko, gifite ibyiza byinshi: 1. Kuramba, ugereranije na damsheets cg ibindi bigega bya plastique 2. Amazi ntayoyorwa na evaporation nko mu ma dams. 3. Isuku y'amazi ugereranije na dams zifata isuri! ...”

MWOROZI, TEGANYIRIZA IMPESHYI!