Mu igikorwa cyo gusoza amahugurwa no gutanga ibyemezo (Certificates) ku rubyiruko 54 rwo mu Karere ka Huye na Gisagara rwahuguwe mu gihe cy'amezi 3 n'umushinga “Youth for Youth“ wa Caritas ya Diocese Gatolika ya Butare na CRS, hatanzwe ubutumwa buhamagarira urubyiruko guhanga imirimo no guteza imbere ishoramari.

Iki gikorwa cyabereye mu Karere ka Huye cyitabirwa n‘urubyiruko rwo mu turere twa Huye na Gisagara rwahuguwe ku micungire y'imishinga, gushyira mu bikorwa imishinga, gukurikirana imishinga n'ubucuruzi. 

Bahuguwe nk'abafashamyumvire muri gahunda yo kuzajya bafasha urundi rubyiruko rwifuza kujya mu ishoramari no kwihangira imirimo.

Musenyeri Jean Bosco Ntagungira, umushumba wa Diyosezi Gatolika ya Butare n'abandi bayobozi batanze ubutumwa bwagarutse ku nshingano z'urubyiruko mu guhanga imirimo no guteza imbere ishoramari mu turere. Basaba ko hakomeza ubufatanye mu gufasha igihugu kwihuta mu iterambere rishingiye ku ikoranabuhanga no gukora ishoramari rinoze kandi urubyiruko rukarangwa no gukorera hamwe no gufatanya.

Ku ruhande rw'Akarere ka Huye hahuguwe 26 na 28 mu Karere ka Gisagara. Urubyiruko bakurikirana ni 3,947 rwo mu Karere ka Huye na 4,318 bose bari mu bikorwa by'ishoramari binyuranye.