Abikorera bo mu Karere ka Huye bakoze urugendoshuri n’umwiherero hagamijwe gukomeza kunoza ingamba z’imikorere, imitangire ya serivise no kugira uruhare mu iterambere ry’Umujyi wa Huye hitabwa ku gishuhsnyombonera. 

Kuva kuwa 11 kugera kuwa 13 Ukuboza 2024, ku bufatanye bw’Akarere, urugaga rw’abikorera bo mu Karere bakoze urugendoshuri rwatangiriye mu Mujyi wa Kigali, mu Karere ka Nyarugenge, runakomereza mu turere twa Musanze na mu Ntara y’Amajyaruguru na Rubavu mu Ntara y’Uburengerazuba.

Nk’uko byasobanuwe, uru rugendoshuri n’umwiherero byari bigamije kureba uburyo bwo gushyira mu bikorwa igishushanyo mbonera (Master Plan) kandi n’ibindi bikorwa bidahagaze; kwigira ku iterambere ry’ubucuruzi mu mijyi basuye; kuganira ku ruhare rw’Abikorera mu guteza imbere isuku n’umutekano, kwitabira gahunda ya Ejo Heza no kuganira ku ishyirwa mu bikorwa rya gahunda y’ibikorwa by’Ihuriro ry’Abafatanyabikorwa mu Iterambere.

Uru rugendoshuri rwasojwe n’umwiherero wari ugamije kwiga ku iterambere ry'Umujyi wa Huye, umwiherero wanitabiriwe n’Umuyobozi w’Akarere Sebutege Ange. 

Muri uyu mwiherero harebwe ku mahirwe y'ishoramari mu Karere ka Huye no mu Mujyi wa Huye by'umwihariko; uburyo Banki n'Ibigo by'imari biteguye gufasha Abikorera mu Karere kubona amafaranga adahenze yo gushora mu mishinga iteza imbere Umujyi wa Huye, Ubucuruzi, Inganda n'ubukerarugendo n‘ibikorwa bya PSF n'Uburyo ifasha Abanyamuryango mu buvugizi n'imikorere y'ubwishingizi mu buvugizi n'Ingamba zo kubaka Urugaga Rukomeye rw'Abikorera

Umuyobozi w'Akarere Ka Huye asoza umwiherero yashimiye buri wese wawitabiriye kandi yizeza Gukomeza Ubufatanye bw'Akarere, Abikorera n'izindi nzego hagamijwe guteza Akarere ka Huye n'igihugu.